Kuch dinon jse ek khayaal tha Dil mein,
Soch raha hoon aaj ki Mehfil mein,
Indradhanush parosoon tujhe main,
Rangon se bhari thali mein.
Rang pehla jo yeh Baingani hai,
Isise museebat padi hai,
Kambakht yeh paka Baingan hi,
Baingani nahi hai.
Dhoondte hue Baingani vyanjan,
Bhool baitha main bhojan ka sevan,
Bhook lagne pe khola tha fridge jo,
Samne pade the angoor woh,
Rang unka bhi kuch Baingani tha,
Ras bharpoor, mitha sahi tha,
Bas socha ki pehla vyanjan yahi hai,
Rangon se bhari thali mein.
Par agla toh usse bhi mushkil,
Jamuni sunte hi baitha mera Dil,
Jaamun hi aa raha tha mann mein,
Par baingani se haar ke gham mein,
Main nahin lena chahta tha kadam yeh,
Soch meri magar atak gayi thi,
Jaamun ko pakad ke latak gai thi,
Toh jaa ke le aaya mandi se,
Woh Jaamun jo Jaamuni the,
Ab do rang mil hi gaye hain,
Rangon se bhari thali mein.
Ab teesre ko jaise hi dekha,
Pen aur kagaz ko hi de phenka,
Khaana hota bhi Neela kahin hai?
Iska matlab hi ab kuch nahin hai.
Tab socha google hi kar loon,
Thoda dimaag ko aaram hi de doon.
Par jiska tha dar hua wahi,
Mila agla jo, tha wo bhi fal hi,
Ab to lagta hai yahi kismat hai meri,
Neele rang ki mili jo Blueberry,
Teen rangon ki tigdam bani hai,
Rangon se bhari thali mein.
Ab agla jo rang hai Hara hai,
Mann mera machal ja raha hai,
Lag raha hai ab toh yeh hai aasan,
Hara toh ban hi jaayega pakwaan.
Toh le aaya thodi si Bhindi,
Chadha di pakne leke ek handi,
Par yeh kya, kuch der mein jo dekha,
rang Hare se gaya tha behka,
Socha yeh bhi na ho paaya mujhse,
Nafrat hi hone lagi thi khudse,
Andar se awaaz aayi tabhi,
Laake rakh deta hoon ismein main Kiwi,
Chaar rang ab poore hue hain,
Rangon se bhari thaali mein.
Rang peela tha panchwa jo aaya,
Saath mein mere mann ki shanti bhi laaya,
Laga ab to ho jayega sab aasan,
Banengein anekon pakwaan,
Dal, aloo ya tehri, kuch bhi bana doon,
Ek cheez chun ke, Thali mein saja doon,
Phir laga achanak ek zorka dhakka,
Aage ka shoch ke reh gaya hakka bakka,
Dal, sabzi ka saath kaun dene aayega,
Kya roti ya chawal agla rang de paayega?
Dil pe haath rakh maine usko samjhaya,
Fal hi dhoondh lein yeh dilaasa dilaya,
Aam se panch rang pure hue hain,
Rangon se bhari thaali mein.
Agla rang toh nikla Narangi,
Ab toh sochne ki shakti mein thi thodi tangi,
Jab sab hi fal ikkathe kiye hain atrangi,
Toh chhate rang ko kar lete hain Narangi.
Ab socha ki aakhri bhi fal hi le lein,
Laal rang hi bacha hai, Tarbooz se he khelein.
Jaake phir le aaya dono hi,
Sab ke saath rakh diya inhein bhi,
Ab dekha ki rang sare poore hue hain,
Rangon se bhari thaali mein.
Sab dhoya aur kaata, thali mein parosa,
Dekh kar uth gaya khudpe se bharosa,
Kahan nikla tha pakwaanon ka Indradhanush banaane,
Reh gaya bas falon ko thali mein sajane.
Phir ghanti baji dimaag ke andar,
Socha kuch toh karein inhi se sikandar,
Toh dala sab falon ko ik donge mein,
Dali shakkar, masala aur neembu ki bundein,
Sab mila jula kar zaban pe lagaya,
Toh laga ki jannat ka maza hai aya,
Parosne ke liya jab thali mein daala,
Hatheli ko hi maathe pe de maara,
Rang samne the par reh gayi kuch kami thi,
Unki sunderta jaise kuch dhaki hui thi,
Dekha idhar udhar to, pade the chilke sab,
Usmein tarbooz ka chilka tha, jaise koi tub,
Use uthaya aur thoda sa design banaya,
Phir falon ko uske andar sajaaya.
Ab lag raha tha Indradhanush ke jaisa,
Jo nikla tha karne bas waise ka waisa,
Dil ka yeh armaan ab pura hua hai,
Yeh Indradhanush jo tujhe parosa hai,
Rang saaton yahaan kitne nikhre hain,
Rangon se bhare is Tarbooz numa thali mein.